Свідницька радниця про пандемію не орґанізовала тот рік ниякы акты з нагоды 76-ой рôчниці освобожденія міста, кедь же Словакія є в локдавні.

Но приматорка міста Марцела Іванчова вєдно из своим заступником Михайлом Ґоріщаком выразили у віторок 19-го януара 2021-го року почливôсть освободителям індивидуально. Інформовала о тҍм аґентура ТASR.
„Памятник совітьской армії у Свіднику днесь творить неоддумательну часть силуета Свідника, а єще выразніше творить сімвол складної войнової історії міста. Туй ся стрічать історія и сучаснôсть нашого міста. Іде рҍч о веце як 9000 людьскых жизней, майже тілько, як має теперь Свідник жителів. Были они далеко од домốв своих, де їх даремно чекали матери, жены ци діти. Возду́шнôв ча́рôв пару сто кілометрів, но про тых хлопів уж нездолательна далекôсть,“ – повіла п. Іванчова.
І кедь памятник за єї словами є повязаный з терпіньôм, болестьôв и утра́тôв, спринимать го и в повязаню из атмосферôв ти́хости, поко́я и міра.
„Тоты вояци перемогли, жебы мы жыли в мирі. Є першоряднôв нашôв повинностьôв, нашым дốвгом односно тых, павших, жебы сьме го всокотили и хранили. Лем так їх жертвы не будуть даремны, – “ констатовала приматорка Свідника.
Іванчову зенпокоює, же в сучасности вопрос войны и міра злегшать ся и баґетелізує, росте екстремізм, исчезать толеранція и порозуміня. „Я пересвідчена, же вшиткы мусиме усвідомити собі свою частку одповідности, и пропоновати способы, як тот пла́ный тренд одвернути,“ – доповнила она.
Память павшых героїв учтили собі коло памятника на Дукли, у Свіднику, и коло памятника армадного ґенерала Людвіга Свободы.
За жрідлами https://www.lem.fm/predstaviteli-svidnika-pripomyanuli-sobi-oslobodzhinya-i-na-dukli/